စပိန်နိုင်ငံတောင်ပိုင်း၊ အန်ဒါလူစီယာဒေသရဲ့ လှပတဲ့ရှုခင်းတွေကြားမှာ ထူးခြားအံ့ဖွယ်ကောင်းတဲ့ မြို့လေးတစ်မြို့ ရှိပါတယ်။
အဲ့ဒါကတော့ ဆယ်တန်နီးလ် ဒယ်လာစ် ဘိုဒယ်ဂါစ် (Setenil de las Bodegas) လို့ အမည်ရတဲ့ မြို့လေးပါ။ ဒီမြို့လေးရဲ့ထူးခြားချက်ကတော့ ကြီးမားတဲ့ကျောက် ဆောင်ကြီးတွေအောက်မှာ အိမ်တွေကို ဆောက်လုပ်ထားတာပါပဲ။
ရာစုနှစ်ပေါင်းများစွာကတည်းက တည်ရှိခဲ့တဲ့ ဒီမြို့လေးဟာ သဘာဝတရားနဲ့ လူသားတွေရဲ့ လိုက်လျောညီထွေစွာ နေထိုင်မှုရဲ့ ပြယုဂ်တစ်ခုပါပဲ။
အန်ဒါလူစီယာခေတ် မှာ မြို့အဖြစ် စနစ်တကျ တည် ဆောက်ခဲ့ပြီး၊ Rio Trejo မြစ်ကြောင်းတလျှောက် ကျောက်ဆောင်တွေ ထိုးထွက်နေတဲ့နေရာမှာ အိမ်တွေကို တည်ဆောက်ခဲ့ကြတာပါ။
ဒီလိုကျောက်ဆောင်တွေအောက်မှာ အိမ်ဆောက်ရခြင်းရဲ့ အဓိကအကြောင်းအရင်းကတော့ သဘာဝရဲ့ အအေးနဲ့အပူဒဏ်ကို ကာကွယ်ဖို့ပါပဲ။
နွေရာသီမှာဆိုရင် ကျောက်ဆောင်ကြီးတွေက နေရောင် ခြည်ကို တိုက်ရိုက်မကျရောက်အောင် ကာကွယ်ပေးလို့ အေးမြပြီး၊ ဆောင်းရာသီမှာတော့ ကျောက် ဆောင်တွေက နွေးထွေးမှုကို ထိန်းသိမ်းပေးပါတယ်။
ဆယ်တန်နီးလ်မြို့လေးဟာ လှပတဲ့ ကျောက်ဆောင်လမ်းကြားတွေ၊ အိမ်ဖြူဖြူလေးတွေနဲ့အတူ စိတ်ဝင်စားစရာကောင်းတဲ့ သမိုင်းကြောင်းတွေလည်း ရှိပါတယ်။
ကျောက်ဆောင်တွေအောက်မှာ ဖွင့်လှစ်ထားတဲ့ စား သောက်ဆိုင်တွေ၊ ဘားတွေမှာ ဒေသထွက် ဝိုင်နဲ့ tapas လို့ခေါ်တဲ့ အမြည်းတွေကို မြည်းစမ်းရင်း မြို့လေးရဲ့ သမိုင်းကြောင်းကို လေ့လာနိုင်ပါတယ်။ လက်ရှိမှာတော့ ဆယ်တန်နီးလ်မြို့လေးမှာ လူဦးရေ ၂,၇၀၀ ဝန်းကျင် နေထိုင်လျက်ရှိပါတယ်။
သင်ဟာ သမိုင်းကြောင်းကို စိတ်ဝင်စားသူ၊ သဘာဝအလှကို မြတ်နိုးသူ ဒါမှမဟုတ် ထူးခြားတဲ့ အတွေ့အကြုံကို ရှာဖွေနေသူဆိုရင်တော့ ဆယ်တန်နီးလ်မြို့လေးဟာ သင့်အတွက် မဖြစ်မနေ သွားရောက်လည်ပတ်သင့်တဲ့ နေရာတစ်ခု ဖြစ်ပါတယ်။
